Ekki talið óhætt að auka við keilu- og skarkolakvótann
- aukning á skötuselskvótanum var ekki skoðuð
Ekki er talið óhætt að auka við keilu- eða skarkolakvóta ársins að sögn Árna M. Mathiesen sjávarútvegsráðherra. Hann segir aukninguna í keiluveiðunum stafa af því að ókynþroska fiskur sé kominn inn í veiðina og engar sjáanlegar breytingar séu á skarkolastofninum.
Þetta kom fram á blaðamannafundi í morgun þar sem tilkynnt var um aukningu á ufsa-, sandkola-, kolmunna- og úthafskarfakvótanum. Ráðherra sagði að með því að auka ufsakvótann um átta þúsund tonn hefði hann gengið gegn tillögum Hafrannsóknastofnunar en það væri mat sjómanna og margra annarra að ástand stofnsins væri með þeim hætti að hann þyldi aukna veiði. Veiðistofn ufsa væri nú áætlaður 175 þúsund tonn en það væri sú tala sem gert hefði verið ráð fyrir að stofninn væri í eftir tvö ár. Uppbyggingin hefði því verið hraðari en gert hefði verið ráð fyrir.
Varðandi kolmunnakvótann þá sagði sjávarútvegsráðherra að aukningin nú væri m.a. tilkomin vegna þess að Evrópusambandið hefði ákveðið að auka leyfilegt aflamagn frá fyrra ári. Ísland, ESB og Færeyjar hefðu dregið úr sókninni í kolmunnann um 25% í fyrra miðað við árið 2001 en Norðmenn hefðu hins vegar haldið sínu striki.
-- Ef við miðum við árið 2001 þá höfum við dregið jafn mikið úr okkar aflaheimildum á kolmunna og ESB hefur gert, sagði Árni M. Mathiesen en í máli hans kom fram að við mat á aukningu aflaheimilda á þessu fiskveiðiári hefði það ekki verið til skoðunar að auka við skötuselskvótann.
