Enn er ósamið um úthafskarfakvótann
Stefán Ásmundsson, skrifstofustjóri alþjóðaskrifstofu sjávarútvegsráðuneytisins, sem hefur haft með höndum samningaviðræður á vettvangi NEAFC fyrir hönd ráðuneytisins, segir í samtali við Fiskifréttir að það eitt sé ljóst að draga verði verulega úr úthafskarfaveiðunum á þessu ári frá fyrra ári. Um það eitt sé nokkuð góð sátt innan NEAFC og verið sé að þreifa á því hvort það geti gerst með því að samkomulag takist um heildarkvóta eða með því að einstök ríki setji sér sína eigin kvóta.
Til upprifjunar má geta þess að Alþjóðahafrannsóknaráðið (ICES) lagði til mikinn niðurskurð á aflaheimildum í úthafskarfa fyrir komandi vertíð en tillaga ráðsins var alls 41 þúsund tonn. Stefán bendir reyndar á að þar sem að mælingar á karfastofnunum hafi gengið illa þá hafi mælingin, sem ICES styðst við, aðeins náð til annars af tveimur veiðisvæðum eða karfastofnum. Íslendingar hafa talað fyrir því innan NEAFC og ICES að veiðistjórnuninni á úthafskarfaveiðunum væri stjórnað með tilliti til þess að um tvo aðgreinda stofna væri að ræða, þ.e.a.s. úthafskarfa og svo djúpkarfa sem heldur sig aðallega neðan við 500 m dýpislínu. Að sögn Stefáns felst það í tillögum ICES að reynt verði að tryggja ekki verði tekinn meiri afli af öðru veiðisvæðinu umfram hitt þótt ráðið hafi ekki gengið svo langt að segja að um tvo aðskilda stofna sé að ræða. Fyrir því séu þó eingöngu praktískar ástæður að sögn talsmanna ráðsins. Evrópusambandið hafi hins vegar ekki viljað samþykkja þá orðanotkun að tala um tvo ,,stofna” karfa heldur eingöngu um tvö aðskilin veiðisvæði.
Tillaga strandríkjanna, Íslands og Danmerkur, fyrir hönd Grænlands og Færeyja, gera ráð fyrir 82 þúsund tonna heildarkvóta á veiðunum á þessu ári og að honum verði skipt jafnt á milli úthafskarfastofnsins og djúpkarfastofnsins. Tillaga Evrópusambandsins miðast hins vegar við 75 þúsund tonna aflahámark þannig að ljóst má vera að ekki ber svo mikið í milli þegar horft er til tillagana um leyfilega hámarksveiði á vertíðinni sem væntanlega hefst í byrjun apríl nk.
Þess má geta að fulltrúar strandríkjanna hittust á fundi í byrjun síðustu viku þar sem farið var yfir stöðu mála. Í framhaldinu verður rætt óformlega við önnur NEAFC ríki í því skyni að ná fram samkomulagi eða málamiðlun um skipulag veiðanna áður en vertíðin hefst.
