Grænlendingar bregðast við gagnrýni á ofveiði á náhvali og mjaldri og setja kvóta á veiðarnar
Löggjöf um hámarksveiði á hvalategundunum náhval og mjaldri virðist vera að líta dagsins ljós á Grænlandi. Ljóst er að veiðarnar verða takmarkaðar og þar með bregðast grænlensk stjórnvöld við mikilli gagnrýni umhverfisverndarsamtaka sem talið hafa náhvali vera ofveidda.
Það eru alþjóðasamtökin Whale and Dolphin Conservation Society sem hafa beitt sér harðast fyrir því að dregið verði úr veiðum inúíta á návölum. Hafa samtökin snúið sér til CITES, sem fjallar um viðskipti með afurðir af dýrum og úr plöntum sem taldar eru vera í útrýmingarhættu, og beðið stofnunina um að beita sér fyrir nýju mati á stofnstærð náhvala við Grænland.
Kvótasetning á náhvala- og mjaldraveiðum hefur verið til umræðu í grænlenska landsþinginu nokkur undanfarin ár. Amalie Jessen frá grænlensku fiskistofunni segir að búið sé að undirbúa lagasetningu en landsstjórnin eigi eftir að fjalla um málið. Þó er vonast til þess að hægt verði að kvótasetja veiðarnar frá og með næstu áramótum.
Samtök smáhvalaveiðimanna á Grænlandi eru óánægð með boðaða kvótasetningu enda telja þau að kvótasetningin muni hafa í för með sér mikið tekjutap fyrir veiðimenn. Búast megi við hörðum viðbrögðum frá hvalveiðibæjunum ef kvóti verður settur á veiðarnar. Í Nuussuaq er í ár verið að veiða um 700 smáhvali af fyrrnefndum tegundum. Þar telja menn að kvótasetningin muni í besta falli verða til þess að veiðimönnum á staðnum verði leyft að veiða 400 hvali á næsta ári en í versta falli aðeins 100.
Elias Larsen formaður félags hvalaveiðimanna á staðnum segir veiðimenn fá 1200 ísl. kr/kg fyrir hvalkjötið og fyrir 50 kíló af kjöti fáist því 60 þúsund krónur. Til þess að sama verðmæti á selaveiðum þurfi veiðimenn að veiða allt að 20 seli.
