Hvað voru ýsurnar gamlar?
Einn af mikilvægum þáttum í starfsemi Hafrannsóknastofnunarinnar er að meta stærð fiskistofna. Til að meta stofnstærð þarf að finna út hve mikið er af fiski í hverjum aldurshópi og til þess þarf að aldursgreina fiskana. Sýnum til aldursgreininga er safnað í rannsóknaleiðöngrum og úr afla fiskiskipa. Á hverju ári eru um 100 þúsund fiskar aldursgreindir á þennan hátt á Hafrannsóknastofnuninni.
Hjá flestum fiskum eru kvarnir notaðar til aldursgreininga en hjá einstaka tegundum er þó einnig notað hreistur. Kvarnirnar eru beinvölur í innra eyra fisksins. Þær þjóna fiskinum fyrst og fremst fyrir jafnvægisskynið en einnig heyrnina. Fiskurinn vex mest á sumrin en á veturna er vöxturinn hægur. Kvarnirnar vaxa í takt við fiskinn og í þversneið af kvörnunum má sjá vaxtarbauga eða árhringi sem myndast vegna þessara árstíðabreytinga í vextinum. Með því að telja baugana fæst aldur fisksins.
Frá þessu er skýrt á vef Hafró
