Um þessar mundir eru 100 ár liðin frá siglingu fyrsta mótorbátsins á Íslandi. Báturinn hét Stanley og var honum siglt frá Ísafirði til Hnífsdals 25. nóvember árið 1902. Tímamótanna verður minnst með veglegum hætti á Ísafirði um helgina.

Erlendir sérfræðingar á sviði sjávarútvegs hrósa Namibíumönnum fyrir fiskveiðistjórnunarkerfið sem þar var innleitt fyrir um áratug. Þeir segja að kerfið hafi hjálpað til við að byggja upp fiskistofna sem verið höfðu ofveiddir á áttunda og níunda áratug síðustu aldar.

Búið er að veiða tæplega 50 þúsund tonn af síld á vertíðinni eða 38,4% af leyfilegum heildarafla. Aflahæsta skipið er Örn KE með 4992 tonn en alls hafa þrjú skip fengið meira en 4000 tonna afla á vertíðinni.

Svo er að sjá og heyra að kröfur Evrópusambandsins um margföldun á greiðslum EES-ríkjanna í þróunarsjóð sambandsins hafi haft þau áhrif í Noregi að stöðugt fleiri framámenn í norskum sjávarútvegi eru að komast á þá skoðun að réttast sé að afskrifa EES-samninginn en sækja þess í stað um aðild að ESB.

Siggi Bjarna GK er það skip landsmanna sem veitt hefur mest af skötusel það sem af er fiskveiðiárinu. Afli skipsins var í byrjun vikunnar kominn í 18,1 tonn.

Þorskafli breskra skipa, sem landað er á Bretlandseyjum, dróst saman um 18% á fyrri hluta ársins í samanburði við sama tímabil í fyrra. Alls var landað 11.200 tonnum af þorski fyrstu sex mánuði ársins og nam aflaverðmætið um 1443 milljónum ísl. króna.